Topographia Bavariae/006

GenWiki - Digitale Bibliothek
Topographia Bavariae
Inhalt
A B C D E F G H I J K L M N O P Q R S T U V W X Y Z
<<<Vorherige Seite [005]	Nächste Seite>>> [007]
Datei:Zeiller Topographia Bavariae.djvu
Hilfe zur Nutzung von DjVu-Dateien
Texterfassung: korrigiert
Dieser Text wurde anhand der angegebenen Quelle einmal korrekturgelesen. Bevor dieser Text als fertig markiert werden kann, ist jedoch noch ein weiterer Korrekturdurchgang nötig.

vnd da herumb/ vnd an die Nab/ gesetzt; da vor Jaren die Narisci, Naristi, oder Naristesthi Narischen/ vom Wasser Nab also genannt (es were dann/ daß die Nab vor Zeiten thi Nare geheissen hätte/) so Schwaben gewesen/ gewont haben. Zu disen Boiis sollen folgents/ wie man ins gemein will/ auch Norici kommen seyn/ als sie etlich 100. Jahr/ nach Christi Geburt/ von den Hunnen vber die Thonaw gejagt/ vnn vertrieben worden/ od sich selbsten/ auß Forcht vor jnen/ vmm mehrer Sicherheit willen/ hieher begeben haben; nach welchen/ wie man ins gemein darfür hält/ ein guter Strich dieses Lands/ sampt dem Nürnberger Gebiet/ den Egrich- vnd Elnbogischen Craisen; den Marggäflich-Culmbachischen Orten; den Bistumb Eichstatt; der Landgraffschafft Leuchtenberg/ der ReichsStatt Weissenburg/ vnd GemeinStatt Weiden/ das Nordgow (davon aber der weniger Theil zum Bäyrischen Cräyse gehörig ist) genandt wirdt; Obwol Andreas Brunner part. 2. Annal.Boicorum p.50. will/ daß Northgoia so vil als Aquilonaris regio seye/ so von den Neuern/ vmbgekehrter Weise/ den Namen Norici bekommen habe. Deßwegen aber/ vnd ob sich die Jnwohner zum Theil Noricos, zum Theil Variscos recht/ vnd eygentlich nennen/ wir vns in keinen Streit einlassen wollen. So vermeynt Marquardus Freherus in ep. ad D. Gevvoldum, vnd part. 2. Orig. Palatin. c.4. daß der Ambergische/rc. Strich mehr zu Schwaben/ als zu Bäyern zu rechnen seye; vnd sagt/ daß solche Pfältzische Orth/ auß Geschanck deß letzten Hertzogen in Schwaben/ deß Cunradini, der Pfaltzgrafen Ludwigen/ vnnd Heinrichen Schwester Sohns/ an die Pfaltz kommen/ vnd selbige Verschanckung auch von Käyser Rudolphen dem Ersten/ vnd denen Churfürsten/ bestättiget worden seye. Theils machen die Obere Pfaltz zu einem Stück von Franckenland/ wie sie dann daran gränzet; auch gedachten Hertzogs Conradini Vorfahren etwan Hertzogen in Francken/ vnd Grafen zu Rotenburg/ gewest seyn. Beym Andrea Brunnero part.3. Annal. Boicor, lib.15. p.906 stehet/ daß/ als nach dem Tode deß letzte Hertzogen in Schwaben/ deß Conradini, wegen seiner Erbschafft/ zwischen den 2. Brüdern/ Ludwigen/ vnd Heinrichen/ Hertzogen in Bäyern/ Streit vorgefallen/ so seyen durch Schieds-Richter/ auf de Tag zu Aufhusen/ Hertzog Heinrichen/ dz Schloß/ Flozz/ Parchstein/ Weiden/ vnd Adelnberg: Hertzog Ludwigen aber/ den besagter Cunradinus, bey Lebzeiten insonderheit wolbedacht/ vnd verehret hat/ folgende Ort geben/ vnd zugesprochen worden/ als Neumarckt/ mit der Herrschafft Perngow/ Thonauwerth/ die Herrschafft Möringen/ Schwabeck/ Schongaw/ vnd andere zwischen den Bergen/ vnn den Flüssen Werda vnd Thonaw gelegene Ort; Item Jglingen/ Tapfheim/ vnd was gedachter Conradinus von dem Stifft Bamberg zu Lehen getragen; nämblich die Vogtey Hertzbruck/ Plech/ vnd Vilsegg; Amberg/ Auerbach/ vnd Hohenstein/rc. In der Ableinung/ vnd Widerlegung Pfaltzgraf Carl Ludwigs/rc. Manifesti. od[er] Außschreibens/ im Jahr 1639. gedruckt/ stehet/ wie es bekandtlich/ daß die OberPfaltz von vhralter Zeit/ ein pars integrans, vnnd Stück deß Landes zu Bäyern gewesen/ vnd davon erst/ durch den Paviischen Vertrag/ an die Palltzgrafen erwachsen/ vnd dannenhero auch erst den Nahmen Pfaltz bekommen habe. Theils wollen/ daß allbereyt Ludevicus Severus das ganze Land Bäyern (ausser/ was sein Bruder Heinrich gehabt) sampt der Pfaltz am Rhein/ vnter seine zween Söhne/ Rudophen vnd Ludwigen/ nachmals Käysern/ getheilet/ vnnd dem Rudolphen/ als dem ältisten/ neben der ChurPfaltz/ auch ein Stück vom Nordgow/ nämblich die OberPfaltz/ (so dem Grund/ vnd Boden nach/ in Bayern gelegen) eingeraumbt habe. Vnd obwol jetztgedachter Churfürst Rudolph seinem Bruder/ besagtem Käyser Ludwigen dem IV. in seiner Wahl zuwider gewesen/ vnn es mit Käyser Friderico III. von Oesterreich gehalten/ vnn deßwegen ins Elend/ von Land vnd Leuten ziehen müssen; so habe doch seinen Söhnen er/ d[en] Keyser Ludwig/ Jhr H. Vetter/ nachfolgende Oerther in der jetzt also genandten Obern Pfaltz wider eingeraumt/ vnd solches zu Pavia/ in Jtalia/ deß Jahrs 1329. wie Andreas Ratisbonensis, vnd andere/ schreiben/ bestättigt; nämblich Lauffen/ Heersbrück/ Hertenstein/ Pogniz/ Velden/ Ploch/ Franckenberg/ Waldeck/ Pressen/ Kemmat/ Arndorff/ Thürndorff/ Awerbach/ Newstein/ Newmarckt/ Sulzbach/ Hirschaw/ Hylppoltenstein/