Beiträge zur Genealogie der adligen Geschlechter 4 (Strange)/061

Dries vurs. gededyngt ind eyn gantze vaste stede moitsoene eynen erffkouff ind ewige scheidonge gemaicht hauen tusschen den parthyen vurs. as vp huede sente Sebastianus daich des Hilligen mertelers Anno Zweyindeichtzich in maissen hernae beschreuen volght Item in den yersten so sollen dye egenanten heren Dechen ind Capittell erfflich ind in Crafft eyns ewigen erffkouffs hauen besitzen gebruichen wenden ind keren zo alle yrre gadongen ind wailkomen alsulchen Huyss ind hoff mit allen getzymmer ind gebuwes zo Puffendorp mit bongarden Garden weiden weyeren ackerlandt dreysschen ind myt houltzgewelden tzienden Capuynen hoynre pennynckgelde vort mit synen alinghen zobehoire ind Rechten in ind vyssgelden in nassen ind in drugen groiss ind Cleyne nyet da van vyssgescheiden zo Puffendorp zo Ederen ind anderswa gelegen Item so sall Dries vurs. die vurg. heren Dechen ind Capittell an die vurs. erffschafft ind erffguedere setzen eruen gueden ind weyeren myt wille ind belieffonghe des Landtheren ind der Edeler ind wailgeborner vrauwen Jutten van Ryfferscheit Abdyssen sente Quiryns zo Nuysse vp alle den enden da sich dat van rechte geburt ind allet mit Rade der Strenger vester ind Eirberre Rede ind Scheffen zo Guylge in alsulcher maissen dat die vurs. heren Dechen ind Capittell vur sich ind yre nacomelinge van der vurs. kyrchen wegen waill siecher ind verwart syn tzen ewigen daghen vur yn selffs zo behalden zo verkouffen zo versetzen off anders yren notz ind willen da mit vur zo keren zo alle yrre gadongen sonder yemantz hyndernisse Indracht ind aen argelist Item sullen ouch Johan van Ruysschenbergh here zo Setterich ind syn mondige broidere vur sich ind yren vnmundighen broideren vertzyen erfflich zo den ewigen daighen vp sulche anspraiche forderonge brieue ind Siegele mit alle der gerechticheit sy hauen off hauen moigen an ind vp dye vurs. gliedere ind die gentzlichen vpdraghen ind oeuerlieueren den vurs. heren Dechen ind Capittell beheltlich den seluen broideren yrre anspraichen an Dries vurs. Doch den vurs. heren Dechen ind Capittell an den vurs. guederen in desen moitsoenen vnhynderlich Ind diese verschriuonghe in yrre macht zo blyuen Ind sollen dye selue tzwene mondige broidere van Ruysschenbergh sprechen ind geloeuen guet zo syn ind den vurs. heren Dechen ind Capittell des