Beiträge zur Genealogie der adligen Geschlechter 5 (Strange)/121

12.Quittung der Erbgenahmen Clais von Nattenheim des Jungen für dessen Testamentsexecutoren v. J. 1467.

      Wir Frietsche van Smedburgh van wegen Aleiden van Nattenheym myner lieber moder in crafft eyns maichtbrieffs sy mir dar uber gegeben hait vnd ich vort an Erberhart Blyffer genant Hesze vnd Clais van Merbach mynen guden frunden vnd lieben neuen geliebert han, Johan Krummel van Eynnenten vnd Bartholomesz Blanckart van wegen Meynen van Nattenheym vnser lieber swegerfrauwen vnd moder van gelicher macht als vorgeschr. steit, Katherine van Nattenheym wedefrauwe, Heynrich vnd Johan Merbach gebruder, Johan vnd Godart Kolffe, erben Clais seligen van Nattenheym vnsers lieben Oemen dem got gnade Doin kont vnd bekennen uffenclich in diesem brieff vur vns vnsere erben vnd nakomen das wir van Erberhart Blyffer vnd Clais Merbach vnseren guden frunt lieben neuen vnd broder vurg. as testamentereren Clais seligen van Nattenheyn egenant alle vnd yckliche brieff antreffende eygentum erfflehen anderlehen pantschafft ader was die beruren mogent, vnd vort alles das ghene ysz sy gelt golt silber vesthelamentpenninge ader pennyngs wert vnd we man das anders genennen mag vns durch doit vnsers lieben Oemen seligen vorgeschr. an erstorben vnd zu gefallen ist vnd der selbe vnser oeme selige vns auch muntlichen in syme testamente vormitz sulcher clausulen dar ynne begryffen Item syn erfflehen anderlehen erbe pantschafft vnd ander gut &. besatzt vnd geordineret hait zo geuen gentzlich vnd zomaill entphangen vnd an vns genomen han Dar vmb sagen vnd zelen wir erben vurgeschr. vnd vnser ycklicher in sunderheit saigt vnd zelt vur sich sine erben vnd nakomen die egenanten testamenterer yr erben vnd nakomen vnd alle die gheyne den diese quitancie stedelich sin mach vnd nutzlich sulches testaments vnd lesten willes vnsers oemen seliges vurg.alles sins begryffs vnd yn allen sinen deilen gantz fry quyt losz vnd ledig vnd sin des auch vollenkomentlich van ynne vernuget Wir globen auch in guden truwen sementlich vnd besunder in maissen vorg. ist das selbe testament in allen synen stucken punten vnd artickelen zu vollentzehen zo halden vnd zu hanttaben

---